БИШКЕК, 12-апр. — Sputnik. Эквадордо WikiLeaks порталынын негиздөөчүсү Жулиан Ассанждын жакын адамы кармалганын өлкөнүн ички иштер министри Мариа Паула Ромого шилтеме берип РИА Новости жазды.
Бийлик аны өлкөнүн ички иштерине кийлигишти деп айыптап жатат.
"Ал Ассанждын жакын адамы, ишине дагы тийиштиги бар. Кечээ кечинде Японияга учуп кетүүгө аракет кылып жаткан жеринен кармалды", — деди министр.
Ромонун айтымында, Эквадордо Ассанж менен байланышы болушу мүмкүн делген россиялык эки хакер дагы изделип жатат.
Ал эми Ассанждын адвокаты Карлос Поведа министр WikiLeaks порталынын негиздөөчүсүнүн досу тууралуу айтып жатканын билдирди.
Эске салсак, 11-апрель күнү Жулиан Ассанжды Британиянын полициясы кармаган.
Чуулгандуу маалыматтарды жарыялаган WikiLeaks порталынын негиздөөчүсү Жулиан Ассанж 2012-жылдан бери Эквадордун Лондондогу элчилигинде баш калкалап келген.
Ал АКШнын Афганистандагы, Ирактагы аскердик операциялары жана Гуантанамо лагериндеги шарт тууралуу жазып чыккандан кийин белгилүү болгон.