БИШКЕК, 7-апр. — Sputnik. Түркиянын Стамбул шаарына жаңы салынган "Стамбул" аэропорту 7-апрелден тарта толук ишке киргенин Hurriyet басылмасы жазды.
"Түрк аба жолдору" авиакомпаниясынын директору Билал Экшинин жергиликтүү ЖМКларга берген маалыматы боюнча Стамбулдагы "Ататүрк" аэропорту 7-апрелден тарта жабылды.
Билал Экши ошондой эле 7-апрелден тарта бардык багыттар боюнча каттамдар жаңы аэропорттон ишке ашырыларын билдирди.
"Стамбул" аэропорту расмий түрдө 2018-жылы 29-октябрда Түркиянын президенти Режеп Тайип Эрдоган тарабынан ачылган. Аэропортко 500 учак, 70 миңден ашык автоунаа батат. Андан сырткары, аэропорт жылына 200 миллион жүргүнчүнү тейлей алат.
Аэропорттун курулуш иштери 2023-жылы толук аяктаганда күнүнө 2 миң учакты кабыл ала баштайт.
Ал эми "Ататүрк" аэропорту 1953-жылы эл аралык учуп-конууларды кабыл ала баштаган. 1985-жылы 29-июлда "Ататүрк" аты берилген.