ЫСЫК-КӨЛ, 7-апр. — Sputnik. Ак-Суу районуна караштуу Жаңы-Арык айылында Сеит Кулматов атындагы мектептин жаңы имаратынын курулушу башталды.
Ал эми Каражал айыл өкмөтүнүн башчысы Сагын Баракановдун айтымында, эски мектептин үч имараты бар, анын бири 1978-жылы салынса, дагы бири 1948, үчүнчүсү 1947-жылы курулган.
"Үч имарат тең авариялык абалда. Учурда анда 326 окуучу билим алат. 1991-жылы эле айылга мектеп куруу пландалып, орду казылган. Бул күндү биз 28 жылдан бери күтүп келгенбиз. Мындан төрт жыл мурда мектебибиз авариялык абалда экени аныкталган", — деди Бараканов.
Жаңы салына турган 320 орундуу мектептин жалпы сметасы 48 миллион 790 миң сом. Каражатты "Ысык-Көлдү өнүктүрүү фондусу" бөлөт.
Облус жетекчиси Осмоналиевдин маалыматы боюнча Ак-Суу району боюнча авариялык абалда турган беш мектеп бар.