БИШКЕК, 6-апр. — Sputnik. Москва шаарында Кыргызстандын тышкы иштер министри Чыңгыз Айдарбеков тажикстандык кесиптеши Сирожиддин Мухриддин менен жолугуп, кызматташуу маселелерин талкуулады. Бул туурасында аталган министрликтин маалымат кызматынан кабарлашты.
Тышкы саясий ведомстволордун башчылары эки өлкөнүн чек арага жакын аймактарындагы ынак кошуналык мамилелерди бекемдөөгө багытталган чараларды, эки тараптуу соода-экономикалык, маданий-гуманитардык кызматташтыкты жандандыруу маселелерин талкуулаган.
"Кыргыз-тажик мамлекеттик чек арасын делимитациялоо жана демаркациялоо боюнча өкмөттөр аралык комиссиянын алкагында эки тараптуу сүйлөшүүлөрдү жигердүү улантуунун маанисин белгилешти", — деп айтылат маалыматта.
Тараптар ошондой эле Кыргызстан менен Тажикстандын мамлекет башчыларынын катышуусу менен өтө турган 2019-жылга пландалган тышкы саясий иш-чараларга даярдануу маселелери боюнча сүйлөшкөн.