БИШКЕК, 5-апр. — Sputnik. Президент Сооронбай Жээнбеков бүгүн, 5-апрелде, Элдик Апрель революциясынын 10 жылдыгын белгилөө жөнүндө Жарлыкка кол койгонун өлкө башчынын маалымат кызматы билдирди.
"Эркиндик менен адилеттикти туу туткан намыскөй элибиздин мыкты уулдары 2010-жылдын 7-апрель күнү Кыргызстанда нукура демократиялык түзүлүштү орнотуу үчүн жанын берип, үй-бүлөлүк-кландык башкарууну кулатты", — деп айтылат маалыматта.
Апрель революциясынын 10 жылдыгына байланышкан иш-чараларды өткөрүү үчүн уюштуруу комитети түзүлүп, аны президенттик аппараттын жетекчисинин орун басары Алмаз Кененбаев жетектемей болду. Курам менен президенттин сайтынан толук таанышууга болот.
Жарлык расмий жарыяланган күндөн баштап күчүнө кирет.