БИШКЕК, 3-апр. — Sputnik. Британиялык актриса Жамила Жамил эже-сиңди Кардашьяндарды "өспүрүм кыздардын ден соолугуна зыян келтирүүдө" деп күнөөлөп чыкканын The Sun басылмасы жазды.
Маалыматка караганда, актриса миллиондогон жаштардын кумирине айланган Кардашьяндардын арыктатуучу коктейль, чай жана суусундуктарды жарнамалап жатканына нааразы болууда.
"Силер арыктатуучу заттарды кармап түшкөн сүрөтүңөрдүн алдына келишимдүү болуш үчүн жеке машыктыруучу, диетолог, ашпозчу, жада калса пластикалык хирург жалдай турганыңарды дагы ачык жазсаңар болмок. Антпесе өспүрүмдөр бир эле коктейль менен ушунча болот экен деп алданып жатышат. Баса, алдагы каражаттардын терс таасирин окурмандарыңарга өзүңөр айтпасаңар, мен айтып берем", — деп жазды Жамил эже-сиңдилердин дарегине.
Кортни, Ким жана Хлои Кардашьяндар модель, алып баруучу, актриса катары таанылган белгилүү бир туугандар. Батышта көптөгөн кыз-келиндер аларды сулуулуктун эталону катары көрөт. Ар биринин Instagram баракчасына эле миллиондогон адамдар жазылган.