БИШКЕК, 3-апр. — Sputnik. Жогорку Кеңештин депутаты Асылбек Жээнбеков парламенттин жалпы жыйынында Кыргызстан социал-демократтар партиясына качан жана кандай шартта келгенине кенен токтолду.
Эскерте кетсек, ал буга чейин аталган партиянын курамынан чыкканын жар салган.
"Мен партияга эң оор учурда келгем. 2007-жылы бийликтин өкүмзордугу күч алып, мамлекетибиздин келечегине чоң коркунуч жаралган эле. Ага каршы мыйзам алкагында күрөш жүргүзүү үчүн КСДПнын жер-жерлердеги, өзгөчө Ош аймагындагы таасирин арттыруу тапшырмасы коюлган. Президентибиз Сооронбай Жээнбековдун ошол мезгилде партияга көмөктөшүү сунушунан кийин КСДПнын катарына кошулуп, анын түмөн түйшүгүнө аралашкам. Өзүңүздөр жакшы билесиздер, ал кезде зулум режимге ачык каршы чыгып, партиялык иштерди уюштуруу абдан опурталдуу эле. Өмүрүбүздү тобокелдикке салып, партиялаштарыбыз менен биргеликте адилеттүү коом түзүү максатында ишибизди баштаганбыз", — деди ал.
"Биз социал-демократтар партиялык түзүлүштү чыңдап, күчтүү жана гүлдөгөн өлкөнү курууга бардык күчүбүздү жумшадык. Партиянын катардагы мүчөсү гана эмес, бир кезде КСДПнын жетекчисинин орун басары, Жогорку Кеңештин депутаты, парламенттин төрагасы катары бул иштерге катышканыма сыймыктанам. Партиялар саясий элитанын тагдырын эмес, карапайым жарандардын кызыкчылыктарын коргоп, таламын талашууга тийиш. Партия төрагасынын жеке мүдөөсү, жеке таарынычы, жеке амбициясы мамлекеттин өнүгүүсүнө залакасын тийгизбеши керек", — деди ал.
Асылбек Жээнбеков өз сөзүндө партия парламенттик демократияны өнүктүрүүчү күчкө эмес, жеке адамды жана анын бир ууч тобун сактоочу инструментке айланып баратканына токтолду. Аны менен катар КСДПга эмгеги сиңгендер четке сүрүлүп, бир адамдын диктатурасы орноп калганын айтты.
"Партиянын жетекчиси дайыма "Жалгыз мен баарын кыйраткам" деп жетишилген ийгиликтерди өзүнө ыйгарып келет. Бирок партия тарабынан жасалган иш-аракеттер бир эле адамдын эмгеги эмес, мында убагында президентибиз Сооронбай Шарипович, фракция лидери Иса Шейшенкулович баштаган социал-демократтардын салымы чоң болгон. Жакшы иштердин автору жалгыз өзү болуп, КСДПнын бүгүнкүдөй кризиске кептелгенине башкаларды күнөөлөгөнгө өттү. Бул туура эмес. Кайсы гана партия болбосун, анын жакшысына да, жаманына да партиянын лидери жоопкер", — деди Жээнбеков.
Депутат сөзүнүн аягында мындан ары да Жогорку Кеңештин депутаты ктары элге кызмат өтөй берерин, ал үчүн билими, тажрыйбасы жана кайраты жете турганын айтты.