БИШКЕК, 2-апр. — Sputnik. Пекин Олимпиадасынын (2008-жыл) Грек-рим күрөшү боюнча коло медаль ээси Руслан Түмөнбаев уурдалган медалы жана кайрадан спортко кайтып жаткандыгы тууралуу Sputnik Кыргызстан маалымат агенттигинин кабарчысына айтып берди.
Түмөнбаев үйүнө уурулар биринчи жолу кирип жатпаганын билдирди.
"Буга чейин бир нече жолу майда-барат оокаттарды уурдашкан. Милицияга арыз жазган эмеспиз. Анүстүнө жер үйлөр көп тонолот эмеспи. Албетте, медалдар спортто талыкпаган эмгектин көрсөткүчү. Бирок жашоодо андан да маанилүү нерселер бар да. Ата-энем, бир туугандарым дегендей. Медалдар сумкада салынуу болчу. Ууру аларды өткөрсөм акча болот десе керек. Бирок Олимпиаданын медалы өлкөдө саналуу гана кишиде бар. Аны сата албайт, бирөөгө бере албайт. Уяты бар киши кайтарып берет деп ишенем. Эгер табылып калса, алгандарды артыман сүйрөтүп, көп кыйнабайт элем", — деди Түмөнбаев.
Ал ошондой эле 2020-жылы Токиодо өтө турчу Олимпиада оюндарына катышууну пландап жатканын айтып берди.
Руслан Түмөнбаев 2008-жылы Пекинде өткөн Олимпиада оюндарында коло медаль тагынган. Ага чейин 2006-жылы Азия оюндарында дагы коло медалга татыган. 2007-жылы болсо Азия чемпионатында коло, бир жылдан кийин ушул эле чемпионатта алтын алган.
1986-жылы 28-майда Бишкек шаарында туулган спортчу олимпиадалык спорт боюнча дирекциянын орун басарлыгын жетектеген.