БИШКЕК, 2-апр. — Sputnik. Кыргызстанда алгыр куштарга берилчү паспорт даяр болду. Андан сырткары, аларга белги коюу жана бутуна шакек салуунун эрежеси бекитилди. Бул тууралуу Айлана-чөйрөнү коргоо жана токой чарбасы мамлекеттик агенттигинин маалымат кызматы билдирди.
Мындай аракеттер алгыр куштарды кармагандарды бирдиктүү тартипке салуу, куш салуунун улуттук салтын сактоо жана түрдүү иш-чараларга катышуу үчүн жасалууда. Аны менен катар жогору аталгандардын баарын иш жүзүнө ашыруу үчүн нормалар иштелип чыгып, атайын комиссия түзүлдү.
Алгыр кушуна паспорт алам деген жеке жана юридикалык жактар 2019-жылдын август айына чейин арыз менен кайрылса болот. Идентификациялык картанын баасы 760 сом.
"Бүгүнкү күнү мамлекеттик агенттик Сауд Аравиядагы этнофестивалга катышуу үчүн "Салбурун" федерациясынын мүчөлөрүнө алгыр куштар үчүн 26 паспорт берген. Анын 24ү маданий иш-чарага катышып келди", — деп айтылат маалыматта.
Ал эми 2013-жылы күчүнө кирген өкмөттүн токтомуна ылайык, уруксаты жок бүркүт кармагандар 100 миң сом, ителги кармагандарга 250 миң сом айып салынат.
Учурда Кыргызстанда 200дөн ашык киши алгыр куш кармайт. Айлана-чөйрөнү коргоо жана токой чарбасы мамлекеттик агенттиги аңчы деген күбөлүктү 100дөй кишиге берген.