БИШКЕК, 1-апр. — Sputnik. Кыргызстандын Улуттук коопсуздук мамлекеттик комитети вице-премьер Жеңиш Разаковдун тажик чалгындоосуна тиешеси жок экенин аныктады.
УКМК Кылмыш жаза кодексинин 307-беренеси ("Мамлекетке чыккынчылык кылуу") менен сотко чейинки териштирүү иштерин аткарган. Натыйжада Разаков башка мамлекеттердин атайын кызматтары менен байланышы жок экени белгилүү болду.
"2016-жылдын 6-июлунда сайттардын бирине "Быль о том, как чекист чекиста завербовал" аталышындагы жаңылык жарыяланган. Учурда бул сайт иштебейт. Ошол сайтка ээлик кылат делген "Бирдиктүү Тажикстан" оппозициялык уюму менен материалдын Шабнами Собири деген автору ойдон чыгарылган", — деп айтылат маалыматта.
Ошондой эле УКМК чет элдик атайын кызматтар өздөрүнө жакпаган аткаминерлерди ушундай жалган маалыматтарды таратуу менен элге жаманатты кылуу ыкмасын байма-бай колдонуп келерин белгиледи.