БИШКЕК, 1-апр. — Sputnik. Премьер-министр Мухаммедкалый Абылгазиев Баткен облусуна болгон сапарынын алкагында аймактын чектеш райондорунун ички жолдорунун абалы менен таанышты. Бул тууралуу өкмөттүн маалымат кызматы билдирди.
Өкмөт башчы Баткен районундагы Ак-Сай — Рават унаа жолунун абалын текшерип, Ак-Сай – Тамдык жолунун курулушу менен таанышып чыкты.
Транспорт жана жолдор министри Жанат Бейшенов жалпы узундугу 25 чакырымдык Ак-Сай — Рават жолунун курулушу 2014-жылдын январында башталганын, бүгүнкү күнү 18 чакырым жол курулуп бүткөнүн маалымдады.
"Министр Кыргызстан менен Тажикстандын өкмөттүк делегацияларынын сүйлөшүүлөрүнүн жыйынтыгы менен Ак-Сай — Тамдык унаа жолунун курулушу уланып жатканын белгиледи. Азыркы тапта 24,5 чакырым жолдун 13 чакырымы курулуп бүттү. Бул унаа жолдун курулушу Кыргызстандын аймагы боюнча Баткен районунун чектеш аймактарында тоскоолдуксуз унаа каттамдарын шарттайт", — деп айтылат билдирүүдө.
Сапарынын алкагында Абылгазиев Баткен районунун Ак-Сай айылындагы орто мектептин абалынан кабар алып, окуу имаратынын окуу класстарын, ашканасын жана башка жайларын көрүп чыкты.
Тиешелүү органдарга жергиликтүү бийлик менен биргеликте жаңы көпүрөнүн курулушу боюнча сунуштарды киргизүү тапшырылганы маалым болду.
Эскерте кетсек, дал ушул Ак-Сай — Тамдык жолунун курулушунан улам 13-март күнү Баткен районундагы Ак-Сай менен Тажикстандын Мехнатабад айылдарынын жашоочуларынын ортосунда чатак чыккан. Эртеси, 14-мартта, эки тарап бири-бирине таш атып, чыңалуу күч алган. Тажикстандын тургундары жолдун курулушуна каршы чыкканы кабарланган.
Өкмөттүк деңгээлдеги сүйлөшүүнүн натыйжасында аталган жолдун курулушу улантылган.