БИШКЕК, 31-мар. — Sputnik. Адвокат Зузана Чапутова Словакияда өткөн президенттик шайлоонун экинчи турунда 58,38 пайыз менен жеңишке жеткенин РИА Новости жазды.
Ал эми атаандашы Еврокомиссиянын жетекчисинин орун басары Марош Шефчович жеңилүү ызасын тартып, элдин добушунун 41,62 пайызын алгандыгын республиканын статистика боюнча башкармалыгы билдирди.
"Шефчович болгону өлкөнүн чыгышындагы Прешов аймагында көп добуш алса, калган жерлерде Чапутованы колдошкон" , — деп айтылат маалыматта.
Чапутова Словакиянын тарыхында биринчи аял-президент болуп калмакчы.
Мамлекеттин жаңы башчысын азыркы президент Андрей Киска атайын келип куттуктап кеткени айтылат.
Шайлоонун алдын ала жыйынтыгы чыккандан кийин брифингде Чапутова динине, саясий көз карашына, улутуна карабай Словакиянын бардык жашоочуларына бирдей президент болоруна убада берди. Бул билдирүүсүн ал өлкөдөгү негизги үч тилде айтты.
Шайлоонун акыркы жыйынтыгы жекшемби күнү түшкө жуук маалым болот.
Чапутованын президенттик милдетине Кискинин башкаруу мөөнөтү аяктаары менен — 15-июнда киришери айтылды.