Бул дем алышта бишкектик програмисттер "сырын" ачты. Көз жүгүртүп көрсөңүз, чындап эле айрым өтүнүчтөр IT-адисти өзүнөн чыгарып жиберчүдөй экен.
Бирөөнүн баракчасын "ачып бер" деп сурангандар. Эгер түгөйүңө ишенбей жатсаң, өзү менен же психолог менен сүйлөш. Албетте, "каалаган даректи ачып алат", "кыйратат" деген сыяктуу сөздөр биздин кулакка майдай жагат. Бирок бирөөнүн жеке жашоосун айтпай-этпей аңтарып чыгуу — бери дегенде адамгерчиликке жатпайт.
Бир жолу мага бейтааныш кыз телефон чалып, чоң суммадагы акча сунуштады. Ордуна мен анын интернетке тарап кеткен уяттуу сүрөттөрүн жок кылып беришим керек экен. Кыздар, бирөөгө жылаңач болуп түшкөн сүрөттөрдү салаардан мурда жакшылап ойлонгула. Ал киши эртең эле силерге душман болуп калышы ыктымал.
Акчага көмүлүп отурат деп ойлогондор. Айрымдар бизди компьтерге отурса эле миллиондор агылып келе берет деп ойлошот. Ооба, жетиштүү тажрыйба топтоп алган соң айлык да жакшырат. Бирок ага чейин көп эмгек керек. Программа жазуу, аны ишке ашыруу оңой эмес. Сөздүн түптүз маанисинде белиң бекчейип, көзүң чекчейет.
Өзү эмнени каалаганын түшүнбөгөн кардар. Бир келгенде бирди, экинчи келгенде таптакыр башканы айткан кардарларды аябай "сыйлайм". Туугандар, бизге ойлонуп, толгонуп, идеяларды бышырып алып, анан келгилечи, калганын биз ойдогудай кылып беребиз.
Дээрлик жасалып бүткөн ишти оңдоо оңой, бирок айрымдар түп-тамыры менен өзгөртүп салышат. Бир заказды 3-4 жолу жасаган эч бир адиске ырахат тартуулабайт.