БИШКЕК, 27-мар. — Sputnik. Борбор калаада Россиянын 40 жогорку окуу жайынын өкүлдөрү катышкан Кыргызстан менен Россиянын ректорлорунун I форуму өтөт. Бул туурасында Билим берүү жана илим министрлигинен кабарлашты.
"Илим жана билим берүүнүн өнүгүүсү — келечекке инвестиция" аттуу бул иш-чара РФ лидери Владимир Путиндин Кыргызстанга боло турган мамлекеттик иш сапарынын алкагында бүгүн, 27-мартта, болмокчу.
Форумдун максаты — эки мамлекеттин ортосунда илимий жана билим берүү боюнча кызматташтыкты кеңейтүү.
Форумга Россиянын илим жана жогорку билим берүү министри Михаил Котюков, Россиянын агартуу министри Ольга Васильева, Россиялык ректорлор союзунун президенти Виктор Садовничий жетектеген 40 жогорку окуу жайдын өкүлдөрү келет.
Форумдун программасында пленардык отурумдар болот. Андан сырткары, "Орус тили Россия - Кыргызстандын илимий билим берүү интеграциясынын негизи", "Табигый илимий жана гуманитардык жааттагы кыргыз-орус кызматташтыгы", "Экономиканы модернизациялоо шарттарында кадрларды даярдоодо жаңы мамилелер" деп аталган сессиялар иштейт.
Форумдун жыйынтыгында КР жогорку окуу жайлардын ассоциациясынын жана Россиялык ректорлор союзунун кызматташтыгы тууралуу макулдашууга кол коюу күтүлүүдө.
Россия менен Кыргызстандын жогорку окуу жайларынын ортосундагы биргелешкен программаларды жана долбоорлорду ишке ашыруу, кызматташуу боюнча эки тараптуу 79 келишимге кол коюлат.