БИШКЕК, 26-мар. — Sputnik. Ош шаарындагы Акматбек Сүйүмбаев атындагы стадион толугу менен оңдолуп жатат. Бул туурасында аталган калаанын мэриясынан кабарлашты.
"Бүгүнкү күндө стадиондун дарбазасы, тепкичтер, VIP-зал, чуркоо тилкеси, ичиндеги жуунуучу жай жана ажатканасы оңдоодон өтүүдө. Мындан тышкары, сынган отургучтар алмаштырылып, стадиондун административдик имаратынын сырты оңдолууда. Көрүүчүлөр үчүн өзүнчө жаңы ажаткана да курулуп жатат", — деп айтылат маалыматта.
Мындан сырткары, калаа башчысы Таалайбек Сарыбашаев "Ош свет" ишканасына караңгы учурда да жарыктандыруу боюнча тапшырма берип, стадиондо түнкүсүн машыгууга шарт түзүлүшү керектигин айткан.
Сүйүмбаев атындагы стадион 1960-жылы курулуп, 12 миң көрүүчүгө ылайыкташкан. Стадион капиталдык оңдоодон акыркы жолу 2000-жылы өткөн.