БИШКЕК, 25-мар. — Sputnik. Ош шаарындагы кеңседен 4 миллион 706 миң сомду уурдоого шектелип эки улан кармалды. Бул туурасында Ош ШИИБдин маалымат кызматы кабарлады.
Билдирмеге караганда, 8-мартка караган түнү калаанын Алай көчөсүндө жайгашкан жеке менчик кеңсенин сейфинде сакталган каражат уурдалган.
"Ар тараптуу издөө, иликтөө иштеринин натыйжасында 15-март күнү кылмышка шектүү катары К.М. аттуу 24 жаштагы жана 27 жаштагы А.А. (мурда каракчылык менен соттолгон) аттуу жигиттер кармалды. Алар Ош шаарына чектеш жайгашкан айылдардын бириндеги мечиттен чыгып бара жатканда колго түшүрүлгөн. Шектүүлөрдүн бири ошол компаниянын кызматкери болуп чыкты. Уурулук жасоого негизги маалыматты дагы ушул өз кызматкери берип турган", — деп айтылат маалыматта.
Учурда уурулук фактысы боюнча иликтөө иштери жүрүп жатат. Ош шаардык соту алардын баш коргоо чарасын тандап, эки айга абакка киргизди.