Бомбалоо Косово жана Метохиянын автономдуу аймагындагы албан калкын Сербиянын армия жана полициясынан коргоо шылтоосу менен башталган. Бир сутканын ичинде өлкөнүн жети ири шаарына абадан сокку урулган.
Сербиянын клиникалык борборунун нейроонкология бөлүмүнүн башчысы Даница Груйичич РИА Новости басылмасына маек берип жатып, НАТО күчтөрү бул өлкөнү тукум курут кылып, билип турса дагы "айлана-чөйрөгө коркунучтуу" делген аймактарды бомбалоо менен экологиялык алааматка алып келгенин айтты.
"Алар химиялык өнөр жай, мунай, энергетикалык өндүрүштөрдү атайылап бомбалаган. Канчалаган техникалык май, уулуу нерселер абага кетип, жерге сиңип, сууга агып, айрымдары ошол жерде калган. Күйүүчү май төгүлгөн. Беш тонна сымап да Дунай дарыясына кошулганын билебиз", — деди Груйичич.
Югославия урандыга айланып, кийин дүйнө картасынан жоголгон. Ар кайсы маалыматтар боюнча өлкө 30 миллиард доллардан 100 миллиард долларга чейин материалдык чыгымга учураган.