БИШКЕК, 19-мар. — Sputnik. Кыргызстандын вице-премьери Жеңиш Разаков кыргыз-тажик чек арасында болгон окуялар тууралуу негизинен эки чечим кабыл алынганын айтып берди. Бул тууралуу өкмөттүн маалымат кызматы билдирди.
Ага ылайык, биринчиси – бул 13-14-мартта орун алган окуяларды талдоо, экинчиси чек ара аймагында болуп жаткан жумуштар кандай улантылат деген маселе талкууланган.
"Биринчи маселе боюнча биз өтө терең талкуу жүргүздүк. Тажик тарап дагы абдан түшүнүү менен кабыл алып жатат. Эки тараптуу ыкчам тергөө топторун түзүп, болгон окуялардын баарын тактоону тапшырдык. Бүгүнкү күндө биздин маалымат боюнча Кыргызстан жана Тажикстандын прокуратура жана Ички иштер министрликтери биргеликте иштеп жатышат. Бул топ эмне үчүн түзүлдү? Анткени ар бир тарап өз алдынча иштесе, ар кимиси өзүнүн версиясын чыгарып, ошондон улам бир жыйынтыкка келбей, талаш-тартыштар боло берет. Буга байланыштуу ушундай тапшырма берилди", — деди ал.
Разаков ошондой эле чек ара аймактарында түшүнбөстүктөр тез-тезден чыгып катталып турарын айтып, Кыргызстан тарап туруктуу иштөө тобун түзүүнү сунуштаганын белгиледи.
Вице-премьер Ворух айылына барыш үчүн тажик жарандары Ак-Сай айылынын ортосунан өтүүгө туура келерин, Ак-Сай айылынын сырты менен кетүүчү кошумча жол салып бергиле деген сөз буга чейин болгонун кошумчалады.
"Ал маселе 2014-жылы түзүлгөн тийиштүү протоколдо белгиленет. Ал жолдун курулушу бүткөн, бир гана акырына чыгаруучу жумуштар бар. Ошол жумушту да биз аягына чыгарабыз деп сүйлөштүк. Бирок ал жердеги жумушту кыргыз тарап кыларын белгилеп кетиш керек. Кыргызстандын республикалык бюджетинин эсебинен кыргыз компаниясы тарабынан бүткөрүлөт, ал жерде маселе жок. Ушул эле протоколдо белгиленгендей, Ак-Сай — Тамдык жолун да кыргыз тарап куруп, аягына чыгарат деп чечишти", — деди Разаков.
Ошондой эле эки тараптуу сүйлөшүүнүн жыйынтыгында Киревшим жайлоосуна баруу үчүн Ак-Сай — Тамдык жолун салууну тажик тарап түшүнүү менен кабыл алган. Учурда жолду куруу иштери башталып, Кыргызстандын компаниясы иштеп жатат.
Эске салсак, Баткен районундагы Ак-Сай менен Тажикстандын Мехнатабад айылдарынан жашоочуларынын арасындагы чатак 13-мартта чыккан. Эртеси, 14-мартта, эки тарап бири-бирине таш атып, чыңалуу күч алган. Каршылашуунун себеби Кыргызстан тараптан Ак-Сай — Тамдык айланма жолунун курулушу болгондугу айтылган. Вице-премьер Жеңиш Разаков Тажикстан тарап жарандарынын каза болгондугун айтканын билдирген.