БИШКЕК, 18-мар. — Sputnik. Баткен облусундагы кыргыз-тажик мамлекеттик чек арасындагы кырдаалды жөнгө салуу боюнча протоколго кол коюлду. Бул тууралуу өкмөттөн кабарлашты.
Документке Кыргызстандын вице-премьер-министри Жеңиш Разаков менен Тажикстандын премьер-министринин орун басары Азим Иброхим кол койгон.
"Протоколго ылайык, Көк-Таш — Ак-Сай — Тамдык жолунун курулуш иштерин улантуу макулдашылды. Чектеш аймактардагы транспорттук каттам мурдагы режимде иштей баштайт. Вице-премьер-министр Жеңиш Разаков протоколго кол коюуда эки өлкөнүн кызыкчылыктары эске алынмай болгонун билдирди", — деп айтылат маалыматта.
Кыргызстан менен Тажикстандын кыргыз-тажик чек арасындагы кырдаалдын кесепеттерин иликтөө боюнча биргелешкен териштирүү тобунун иши улантылат.
Эки тарапты кепке келтирип, абалды жакшыртуу боюнча президенттер менен премьер-министрлер сүйлөшкөн.
15-мартта абал турукташкан.