БИШКЕК, 17-мар. — Sputnik. Президент Сооронбай Жээнбеков бүгүн, 17-мартта, Аксы районунун Кара-Суу айылында 2002-жылдагы Аксы окуяларында курман болгондордун элесине арналып курулган музейге жана жаңы курулган спортзалдын ачылышына барды. Бул тууралуу өлкө башчынын маалымат кызматы билдирди.
Мамлекет башчысы Жеңижок атындагы этнографиялык музейдин аймагында Аксы окуяларынын 10 жылдыгына карата курулган музейди кыдырып чыкты. Аталган музей 2012-жылы курулган. Өлкө башчы музейдин айланасындагы жерге бак отургузду.
Ачылыш аземинен кийин орто мектептин окуучулары Аксы окуялары боюнча кыскача театрлаштырылган оюн көрсөтүштү.
Мамлекет башчысы жергиликтүү жашоочуларды спортзалдын ачылышы менен куттуктап, Аксы районунда башка аймактардагыдай эле социалдык объектилер курулуп жатканын эске салды.
Ал дагы бир жолу Аксы окуяларынын Кыргызстандагы эркиндик жана адилеттүүлүк үчүн күрөштөгү маанисине токтолуп, келечекте мындай трагедиялар кайталанбашын каалады.