БИШКЕК, 15-мар. — Sputnik. Бишкек менен Ош шаарларында Нооруз майрамына карата ат оюндары өткөрүлө турганын Жаштар иши, дене тарбия жана спорт боюнча мамлекеттик агенттик билдирди.
Көк бөрү боюнча тандоо оюндар 15-21-март күндөрү болот. Бишкекте Жогорку лигада 6 команда ойнойт, ал эми Биринчи лигада беттеше турган командалардын саны азырынча белгисиз. Ошто Жалал-Абад, Баткен жана Ош облустарынан чогулган улакчылар кездешет.
21-март күнү эки шаарда тең көк бөрүнүн финалдык оюну, ошондой эле эр эңиш менен ат чабыш өтөт.
Ат оюндарынын байге фондусу Бишкекте 1 миллион 450 миң сом, ал эми Ошто 400 миң сомду түзөт.
Алгачкы оюндар жума күнү саат 10.00дө башталмакчы.