БИШКЕК, 12-мар. — Sputnik. Феникс шаарындагы (АКШ, Аризона штаты) зоопаркта тордо турган ягуар селфи жасап жаткан аялга кол салды. Бул туурасында BBC жазып чыкты.
Окуя узаган ишемби күнү болгон, аял өтө олуттуу жаракат алган эмес.
Жырткыч менен сүрөткө түшкүсү келген келин тордун жанына барганы айтылат. Ал өтө жакын туруп алгандыктан ягуар тордун тешигинен тумшугун чыгарып аялдын колун тиштеген.
Зоопарктын директору Мики Оллсон жаныбар кармалган жайга жакындабаш үчүн атайын тосмо коюлганын, ал аял тосмонун ичине кирип кеткенин айтты.
Интернетке жарыяланган видеодон болжол менен 30 жаштагы аял жерде колун кармап жатканын жана тордун ичинде турган ягуарды көрүүгө болот.