БИШКЕК, 11-мар. — Sputnik. "Кыргыз чоролору" коомдук бирикмеси 8-март күнү "феминисттердин жүрүшүндө провокациялык аракеттер болду" деп нааразычылык акциясын өткөрүү үчүн мэрияга уруксат кагазын таштаганы барды. Алар жүрүшкө чыгууга уруксат бергендерге чара көрүүнү талап кыларын айтышты.
Бирикме мүчөлөрүнүн пикиринде 8-март күнү митингге чыккан адамдар колдоруна кыргыз улутунун аң-сезимине, менталитетине, баалуулуктарына туура келбеген чакырыктары бар плакаттарды көтөрүп чыгышкан.
"Кыргыз чоролору" менен мэриянын аппарат башчысы Балбак Түлөбаев чыгып жолукту. Анын айтымында, уруксат сураган уюмдар аялдардын укугун коргоого багытталган жүрүш болорун билдирген.
"Конституция боюнча муну эч ким тыя албайт. Бизге энелердин майрамына карата деп уруксат сурап көптөгөн уюмдар кайрылган. Аларга чагымчыл адамдар кошулуп кетерин эч ким билген эмес. Апалардын укугун коргоо боюнча жүрүш болот десе, уруксат беребиз да. Мэр "шаардагы болуп жаткан иштерге өзүм жооп берем. Эгер мен тараптан кеткен мыйзам бузууну тапсаңар, жумуштан кетем" деп жатат", — деди Түлөбаев.
Мындан сырткары, ал калаада митинг өткөрүп же жүрүшкө чыгуу үчүн жолдорду тоспоо, улуттар аралык кастыкты козутпоо сыяктуу эки-үч гана талап коюларын кошумчалады.