БИШКЕК, 11-мар. — Sputnik. "Тазалык" муниципалдык ишканасынын кызматкерлери Токтогул Сатылганов атындагы Улуттук филармониянын алдына тургузулган Манастын эстелигин жууду. Бул туурасында аталган ишкананын маалымат катчысы Жибек Каракеева Facebook тармагында түз эфир аркылуу жазды.
"Эстеликтерди жууп-тазалоо сезонун баштадык", — деп жазган видеонун астына.
Анын айтымында, эстеликти жууп-тазалоо үчүн өрт өчүрүүчү жана жерлерди сугаруучу унаалар колдонулган.
Жакында филармонияны оңдоп-түзөө иштери башталат, аны үчүн жалпысынан 31,5 миллион сом сарпталат.
Ал эми "Ала-Тоо" аянтынын чок ортосунда Айкөл Манастын айкели орнотулган. Анын бийиктиги 21 метрди түзөт.