БИШКЕК, 7-мар. — Sputnik. Октябрь райондук сотунун судьясы Э. Ч. жана аталган органдын бир катар кызматкерлерине КРдин Соттор кеңешинин атайын комиссиясы карап чыккан иштин жыйынтыгынан соң кылмыш иши козголду. Бул туурасында Башкы прокуратуранын маалымат кызматынан кабарлашты.
"Комиссия текшерген учурунда Э. Ч. жана Октябрь райондук сотунун башка кызматкерлеринин 2017-2018-жылдардагы административдик материалдарын жок кылууга катышы бар экендиги аныкталды. Ал эми Э. Ч. өзү ооруканада жатканда административдик материалдарды караган", — деп айтылат маалыматта.
Топтолгон материалдар Кылмыштар менен жоруктардын бирдиктүү реестрине катталып, 320-берененин 4-бөлүмүнүн ("Кызмат абалынан кыянаттык менен пайдалануу"), 204-берененин 3-бөлүмүнүн ("Ири суммадагы алдамчылык") негизинде кылмыш иши козголгон.
Сотко чейинки иликтөө иштери УКМКнын Тергөө боюнча башкармалыгына тапшырылган.