Желим баштыктарын колдонууга тыюу салган мыйзам долбоорун депутаттар тобу сунуштап жатабыз. Эгер кабыл алынса, мыйзам бузгандарга айып пул салынат. Бул тууралуу Экмат Байбакпаев Sputnik Кыргызстан радиосунун таңкы эфиринде маек куруп жатып билдирди.
Анын айтымында, мыйзам долбоору алгач Ысык-Көл облусунда ишке кирет. Ага ылайык, полиэтилен баштыгын же бөтөлкөсүн ыргыткан жеке жактарга 5500 сом, юридикалык жактарга 17 000 сом айып пул салынат. Ал эми аларды өрттөгөн учурда жеке адамдарга 7500, юридикалык тараптарга 23 000 сом айып каралууда.
"Полиэтилен баштыктарынан өлкөнүн экологиясы олуттуу зыян тартып келүүдө. Биз келечекти ойлосок, азыртан буга тыюу салуубуз керек. Желим баштыктарынын адам ден соолугуна зыяны күч. Ал жерге ташталса, 500 жылга чейин чирип жок болбой жата берет экен. Мындан жер кыртышы да олуттуу жабыркайт. Ошондуктан биз мыйзам долбоорун иштеп чыктык. Учурда коомдук талкууда турат. Эгер мыйзам өтүп калса, алгач Ысык-Көл облусунда ишке кирет жана мыйзамды бузгандарга Эреже бузуулар кодексинин III, IV категорияларында айып салынат. Тактап айтканда, желим баштык, бөтөлкөлөрдү ыргыткан учурда жеке жактарга 5500 сом, юридикалык тараптарга 17000, ал эми аны өрттөсө, жеке адамдар - 7500, юридикалык жактар 23000 сом айып пул төлөйт", — деди Байбакпаев.
Эл өкүлү айып пулдардын көлөмү коомчулукту чочутпай, тескерисинче, экологияны коргоого үндөшү зарылдыгын кошумчалады.