Бишкектеги такси кызматтарынын биринин шашкасы тагылган унаа айдоочусу жок жүрүп баратканын күбө билдирип, видеосун Telegram каналына жөнөттү.
Кадрда көрүнүп тургандай, айдоочусу жок унаа Ибраимов, Горький көчөлөрүн аралаган.
"Укмуш, айдоочусу кана? Ушундай да болобу? Таң калычтуу", — деп унаа менен жарыша бараткан айдоочу видеого тартып жатып айткан.
Жол кыймылы коопсуздугун камсыздоо башкармалыгы такси кызматы мындай унаага уруксат албаганын жана бул болгону тамаша тор болушу ыктымалдыгын билдирди.
Ал эми такси кызматынын өкүлдөрү шаарды чын эле айдоочусу жок унаа кыдырып жүргөнүн тастыктап, унаа тесттик режимден өтүп жатканын айтып ишендирүүдө. Ошондой эле унаа боюнча толук маалыматты бир нече күндөн кийин беришерин айтышты.
Мамлекеттик катоо кызматы Кыргызстанда айдоочусуз жүрө турган унаа каттоодон өтпөгөнүн билдирип, автонун номерин базадан карап текшерип көрүштү.
"Унаага тагылган номер 2013-жылы чыккан ак түстөгү Toyota Camry үлгүсүндөгү машинага берилген", — дешти Мамкаттоодон.
Ведомстводон ошондой эле документте унаа айдоочусуз жүрө ала турганы көрсөтүлбөгөнүн кошумчалашты.
Белгилей кетсек, айдоочусу жок көчөлөрдү кыдырып жүргөн унаалар башка өлкөлөрдө дагы элдин оозун ачырган учурлар болгон. Пранкерлер айдоочу отурган отургучка окшош капты кийип алып унааны айдашкан. Мындан улам унаада айдоочу жоктой сезилген.