БИШКЕК, 5-мар. — Sputnik. Жол кыймылы коопсуздугун камсыздоо башкы башкармалыгы 4-марттан 12-мартка чейин Чүй облусунда автоунаасынын маңдайкы терезесин караңгылатып алгандарды аныктоо боюнча рейд өткөрөт. Бул тууралуу Чүй облустук милициясынан билдиришти.
Ага ылайык, бир күндө эле инспекторлор терезесин мыйзамсыз караңгылатып алган 9 автоунааны аныкташкан. Аларга карата Эреже бузуулар боюнча кодекстин 129-беренесинин негизинде протоколдор түзүлгөнү айтылат.
Жакында эле ИИМдин Жол кыймылы коопсуздугун камсыздоо башкы башкармалыгы (ЖКККББ) автоунаасынын терезесин мыйзамсыз караңгылатып алган айдоочуларды жоопко тартуу укугун өзүнө кайтарды. 1-январдан тарта күчүнө кирген жаңы кодекстерге ылайык, бул милдет Транспорт жана жолдор министрлигине берилген. Бирок министрлик терезеси караңгылатылган машиналарды токтоткону менен айып салууга укугу жок болчу.