Camel Fest этнофестивалына барган кыргызстандыктар тамак талашкан жок жана алардын башкалар менен жөөлөшкөн учурун кездештирген жокпуз. Бул билдирүүнү делегациянын костюмери, иш-чаранын катышуучусу Аманат Иманалиев билдирди.
Эске салсак, Camel Fest иш-чарасы 9-марттан 23-мартка чейин өтөт. Анда 98 мамлекеттин өкүлдөрү маданият жана спорт жаатында талантын көрсөтөт. Ага жалпысынан Кыргызстандан 2 миңдей адам катышса, 400ү 2-март күнү жөнөп кеткен.
Ал жактан "Көчмөндөр ааламы" деп аталган этнофестивалын көрсөтүшөт. Кыргызстандыктар үчүн Сауд Аравияда 15 гектар жер берилип, ипподром, этнобазар жана көчмөндөр айылы курулат.
Буга чейин журналист Бегимай Жаныбекова социалдык тармакка Сауд Аравияда жүргөн кыргызстандыктардын жүрүм-туруму уят кылып жатат деген маанайда пост жазган.
Анын айтымында, мекендештер даярдаган дасторконго жабыша калып, табактарына тамакты толтуруп алышат.
“Анысы аз келгенсип бөлмөсүнө ящиктеп суусундук көтөрүп кетет. Же анын баарын түгөтпөйт, ашканага эртерээк келип калгандары кызматкерлердин шаштысын кетирет”, - деп сүрөттөгөн.
Ал текст менен кошо тамак ичкен учурда эркек кишинин бутун стулдун үстүнө коюп алган учурун тартып алган.