БИШКЕК, 4-мар. — Sputnik. Кытай окумуштуулары адам караңгыда көрө ала турган технологияны иштеп чыкканын ВВС жазды.
Изилдөөлөргө караганда, көздүн тор кабыгына нано бөлүкчөлөрдү жука катмар кылып сүйкөсө, фоторецепторлор инфракызыл нурданууга реакция кыла баштайт. Натыйжада адам караңгыда көрүп калат.
Кытайдын илимий-техникалык университетинин кызматкерлери тарабынан иштелип чыккан жаңы техника тажрыйба катары чычкандарга ийгиликтүү жүргүзүлгөн. Жаныбардын көзүнүн тор кабыгына препарат сүйкөлгөндөн кийин алар 10 жума караңгыда көрө алган.
Маалыматта белгиленгендей, препараттын терс жагы — көздүн чели тунарып кеткенинде. Бирок ал бир жумадан кийин тараган.