БИШКЕК, 28-фев. — Sputnik. Быйыл соя, чечевица жана горох эгүү керектигин айыл чарба, тамак-аш өнөр жайы жана мелиорация министри Нурбек Мурашев Ысык-Көл менен Чүй облустарынын фермерлери менен жолугушуу учурунда билдирди.
Министр ысыккөлдүк фермерлерге картошканын аянтын кичирейтип, жогоруда аталган азыктарды эгүүнү айткан.
"Соянын аянтын былтыркы 400 гектардан 5 миң гектарга көбөйтүүнү сунуштайбыз. Соя төө буурчакка окшош. Бирок төө буурчакты бир гектардан эң көп дегенде эки тонна алса болот. Ал эми соя 3,5 тоннага жетип, килограммынын баасы 100-120 сом. Бул, албетте, кирешелүү", — деди министр.
Ал ошондой эле учурда үрөн алып келүү боюнча сүйлөшүүлөр жүрүп жатканын кошумчалады.
2018-жылдын октябрь айынын орто ченинде Мурашев бир жумадан кийин картошкага болгон баа өсөрүн убадалаган. Бирок кийинчерээк бааны рынок гана аныктай турганын айтып алакан жайган.