БИШКЕК, 25-фев. — Sputnik. Кыргызстандын коргоого алынган аймактарында жапайы жаныбарлардын саны көбөйүүдө. Мындай бүтүм жасоого "Алатай" жаратылыш паркына коюлган фотокапкандарга түшкөн сүрөттөр негиз. Бул тууралуу Айлана-чөйрөнү коргоо жана токой чарба мамлекеттик агенттигинен билдиришти.
Үстүбүздөгү жылдын январь айында алты байкоочу камера Батыш Тянь-Шандагы жаратылыштын ар түрдүүлүгү боюнча долбоордун алкагында орнотулган.
Сүрөттөрдөн көрүнүп тургандай, жаратылыш паркынын аймагынан жапайы жаныбарлардын дээрлик бардык түрүн кезиктирүүгө болот.
"Белгилей кетчү жагдай, "Алатай" паркында доңуздар көбөйгөнү байкалууда", — деп айтылат маалыматта.
Жаныбарлар байырлаган "Алатай" жаратылыш паркынын жалпы аймагы 56 миң 826 гектар. Ал жерден Кызыл китепке кирген илбирс, сүлөөсүн, аюу, суусар сыяктуу жаныбарларды кезиктирүүгө болот.