БИШКЕК, 25-фев. — Sputnik. Кыргызстандык кикбоксчу Рустам Ибрагимов борбордо өтүп жаткан K-1 Pro Max эл аралык турниринин алкагында казакстандык Жандос Назарбековду жеңип, Grand Prix Top-4 наамына ээ болду. Бул тууралуу Sputnik Кыргызстан маалымат агенттигинин кабарчысы жеринен билдирди.
Учурда борбордогу Кожомкул атындагы Спорт ордосунда кикбокс боюнча профессионалдар арасында мелдеш өтүүдө. Анда мушкерлер 61 килограмм салмакта беттешти. Натыйжада Ибрагимов казак мушкерин калыстардын чечими менен утуп, Grand Prix Top-4 наамына ээ болуп, сыйлык катары 100 миң сом алды.
Эске салсак, ушул эле турнирде бир саат мурда кыргызстандык спортчу Шахриза Халилова да өзбекстандык атаандашы Мухае Эркинованы жеңип алган эле.
Кеченин башка беттештеринен айырмаланып, Рустам эки кармаш өткөрдү. Ал жарым финалда өзбекстандык Рустам Ильхомду техникалык нокаут менен жер караткан.
Кыргызстандык Ибрагимов кикбокс боюнча дүйнө кубогунун ээси, Азиянын төрт жолку чемпиону.