БИШКЕК, 25-фев. — Sputnik. Бүгүн, 25-февралда, Ош шаарында коомдук транспортто электрондук билеттерди кабыл алуучу автоматташтырылган система ишке кирди. Бул тууралуу калаа мэриясынан билдиришти.
Маалыматка караганда, учурда шаардагы №1 багыттагы троллейбустар электрондук билеттерди кабыл алып жатат.
"Ушул жуманын аягында троллейбустун №2 багыты, ал эми март айында коомдук автобустарда жаңы система ишке кирет. Билеттер Ош шаардык муниципалдык автоунаа мекемесинде сатылат. Картаны алуу учурунда паспорт, ал эми ардагерлердин күбөлүгү болушу шарт", — деп айтылат маалыматта.
Учурда электрондук карталардын балансын толуктоо үчүн терминалдар Ош шаардык муниципалдык автоунаа мекемесинде, ОшМУ, ОшТУ, ОшКУУ жогорку окуу жайларында орнотулду. Жакында "Элсом" электрондук капчыгы аркылуу балансты толуктоого мүмкүн болот.