БИШКЕК, 25-фев. — Sputnik. Мурдагы президент Курманбек Бакиевдин режими жана анын баласы Максим Бакиев учурунда мамлекеттик мүлктү-талап тоноо жана коррупциялык жол менен чыгарып кеткен каражаттарды Кыргызстанга кайтарып берүү боюнча аракеттер башталды. Бул туурасында АКШнын мамлекеттик катчысынын Түштүк жана Борбор Азия боюнча жардамчысынын биринчи орун басары Элис Уэллс билдирди.
Уэллс КР Финансы министрлигинде болгон жыйында учурда 6 миллион доллардын 4,6 миллиону конфискациялоо боюнча буйрукка ылайык кайтарып алынып, Кыргызстанга берилерин белгиледи.
Каржы министри Бактыгүл Жээнбаева бул акчалар чындап эле мамлекеттен мыйзамсыз чыгарылып кеткенин жана америкалык кесиптештердин жардамы менен мыйзамдуу түрдө кайтарып алууга аракеттер көрүлүп жатканын айтты. Ал акчалар сот имараттарында видеого тарта турчу жабдыктарды орнотууга, элет жерин таза суу менен камсыздоого жана саламаттыкты сактоо жаатына керектүү буюм-тайымдарды алууга жумшаларын айтты.
"Бул акчалардын колдонулушу ачык-айкын болот жана аларды пайдаланууда болушунча майнаптуу натыйжа алуу үчүн бардык иш-аракеттер жумшалат", — деди министр.
"Андан сырткары, өлкөнүн өнүгүшүнө бөлүнгөн каражаттарды өзүнүн кызыкчылыгы үчүн уурдаган аткаминерлерге жол бербейбиз деген билдирүүнү жөнөтүп жатабыз", — деди ал.
Жолугушуунун жыйынтыгында уурдалган каражаттарды кайтарып берүү үчүн атайын келишимге кол коюлду.