БИШКЕК, 23-фев. — Sputnik. Ысык-Көл облусунда болгон жол кырсыгында 29 жаштагы милиция кызматкери жана анын төрт жашар кызы көз жумду. Бул тууралуу облустук милициянын маалымат катчысы Сталбек Усубакунов кабарлады.
Окуя 22-февраль күнү саат 21.30да Балыкчы — Ананьево — Каракол унаа жолунда болду.
Автоунаада милиционердин жубайы, 10 жаштагы кызы, үч жаштагы уулу жана досу үй-бүлөсү менен болгон. Алар учурда Түп райондук ооруканасында оор абалда жатканы айтылды.
Милициянын алдын ала маалыматына караганда, Toyota Land Cruiser унаасынын айдоочусу каршы тилкеге чыга калып, милиция кызматкери айдап келе жаткан Audi 100гө урунган.
Кырсыктын кесепетинен милиционер менен төрт жаштагы кызы көз жумду.
Мындан тышкары, жолтандабастын бир жүргүнчүсү дагы ооруканада экени айтылды.