БИШКЕК, 20-фев. — Sputnik. Москвада жолдун четиндеги адамдарды кокусунан койдуруп алган таксист Чыңгыз Анарбек уулу эркиндикке чыгып, туугандары, жакындары менен жолуккан учурдун видеосу интернетке тарады.
Анда абактан бошотулган жигитти алгач карындашы чуркап келип, кучактап, көзүнө жаш алып тосуп алган. Андан соң инилери жана туугандары кезектешип, аман-эсен бошоп чыккандыгын куттуктап жаткандыгын көрүүгө болот.
Акырында эркек балдар менен кучакташып көрүшүп жаткан Чыңгыз "өх..." деп терең дем алып, андан соң өзү да жашып кеткен.
Видеону социалдык тармактагы баракчасына "Замандаш" коомдук фондусунун төрагасы Жеңишбек Молдокматов жүктөгөн.
Эске салсак, 2018-жылдын 16-июнунда кыргызстандык таксист Чыңгыз Анарбек уулу Москванын чок ортосунда жол четиндеги 8 адамды койдуруп кетип, алар жаракат алып, бирок каза болгон эмес.
Жабырлануучулар футбол боюнча дүйнө чемпионатына келген Мексика, Азербайжан, Украина жана Россиянын жарандары экени айтылган.
Sputnik Кыргызстан Чыңгыз Анарбек уулу менен маектешип, кырсык кандайча болуп кеткенин, ал күндөрдөгү абалын өз оозунан укту. Интервью учурунда аны террорчу эмес деген пикирлерин айтып түп көтөрө колдоп чыккан мекендештерине ыраазылыгын билдирген.