БИШКЕК, 20-фев. — Sputnik. Алай районунун Гүлчө айылында 40 жаштагы киши казып жаткан кудугуна түшүп кетип, үстүн шагыл басып калган. Бул тууралуу ӨКМ билдирди.
Маалыматка ылайык, кырсык 20-февраль күнү болгон. Саат 11.54тө чакыруу түшүп, фельдшер менен куткаруучулар үч мүнөттөн кийин окуя болгон жерге барышкан.
"Кудуктун тереңдиги 4 метр экен. Ичи тар болгондуктан бир куткаруучу ичине түшүп, жабырлануучунун үстүн басып калган шагылды чака менен сыртка алып чыгып тазалаган. Саат 15.36да түшүп кеткен киши чыгарылган", — деп айтылат билдирүүдө.
Жабырлануучунун абалы туруктуу экени айтылды.