БИШКЕК, 16-фев. — Sputnik. Кыргызстандын улакчылары Сауд Аравияда өтө турган Сamel fest аттуу эл аралык фестивалга барып, дүйнө элине көк бөрү оюнун көрсөтөт. Бул туурасында Көк бөрү федерациясынын президенти Жыргалбек Саматов билдирди.
Анын айтымында, фестиваль ушул жылдын 9-23-март күндөрү өтүп, ага 95 мамлекет катышаары күтүлүүдө.
"Кыргызстандан 100дөн ашуун ат жиберилет. Анын 75и көк бөрүчүлөрдүн аргымагы болсо, калганы каскадерлордуку. Бүгүнкү күндө аттарга чип коюлуп, эмдөөдөн өтүп, паспорт даярдалып жатат. Сауд Аравия Кыргызстанга атайын учак жиберип аттарды жана катышуучуларды алып кетет. Чыгымдардын баарын уюштуруучу тарап мойнуна алган. Биз барып чыныгы көк бөрүнүн аттары кандай экенин жана кантип ойноо керектигин көрсөтөбүз. Башка өлкөдөн атаандаштарыбыз болбойт", — деди Саматов.
Мындан сырткары, аталган фестивалда Кыргызстан башка улуттук оюндарыбызды дагы көрсөтө турганын кошумчалады.