Экономикалык кылмыштуулукка каршы күрөшүү мамлекеттик кызматынын өкүлдөрү Сот-медициналык экспертиза борборунун Жалал-Абад облусу боюнча бөлүмүнүн башчысын пара менен кармады. Бул тууралуу мекеменин маалымат кызматы билдирди.
Ага ылайык, финансы полициясына А.А. аттуу жаран кайрылып, Сот-медициналык экспертиза борборунун Жалал-Абад облусунун Аксы району, Шамалды-Сай жана Таш-Көмүр шаарлары боюнча аймактар аралык бөлүмүнүн башчысы К.Т. аттуу жаран жалган соттук-медициналык корутунду чыгарып берүү үчүн 100 миң сом талап кылып жатканын айткан.
Аталган факты Жоруктар жана кылмыштар боюнча бирдиктүү реестрге Кылмыш-жаза кодексинин "акча талап кылуу" беренеси боюнча каттоого алынган.
1-февралда ыкчам иликтөө иш-чараларынын жүрүшүндө бөлүм башчы К.Т. 50 миң сом пара алып жаткан жеринен кармалды. Шектүү жаран Бишкектеги №1 убактылуу кармоо жайына киргизилген.
Учурда тергөө амалдары жүрүүдө.