2018-жылы жалпысынан 358 кайрылуу келип түштү. Анын 204үндө мыйзам бузуулар аныкталып, тиешелүү чаралар көрүлгөн. Бул тууралуу Аскат Азарбеков Sputnik Кыргызстан радиосунун эфиринде маек куруп жатып билдирди.
Анын айтымында, 2018-жылы келип түшкөн арыздардын негизинде кардарларга 1 миллион 200 миң сом кайтарылып берилген.
"Мурда керектөөчүлөрдүн укугу бузулган учурда Монополияны жөнгө салуу агенттиги өз алдынча иш жүргүзүп, экинчи тарапка айып пул салып, өндүрүп берчү. Буга товарларды сертификациялоо, анын курамын камтыган маалыматтарды кардарларга туура, так жеткирилишин көзөмөлдөө сыяктуу иштер кирчү. Былтыр эле мындай иш-аракеттердин жыйынтыгында кайрылгандарга 1 миллион сомдон ашуун каражатты кайтарып бергенбиз. Жаңы мыйзамдарда бул функциялар өкмөткө караштуу ветеринардык жана фитосанитардык коопсуздукту көзөмөлдөө мамлекеттик инспекциясына карап калды", — деди Азарбеков.
Ал аталган агенттик учурда товарлардын туура таңгакталуусун гана көзөмөлгө ала аларын кошумчалады.