БИШКЕК, 25-янв. — Sputnik. Кыргызстан "мыкты өлкө" рейтингинде (The Good Country Index) 69-орунду ээледи. 2018-жыл боюнча маалыматтар уюмдун расмий сайтына жарыяланды.
Жалпысынан рейтингге 153 мамлекет кирип, БУУ, ЮНИСЕФ жана Дүйнөлүк валюта фонду сыяктуу эл аралык уюмдар тарабынан берилген 30 көрсөткүч боюнча бааланган.
"Мыкты өлкө" рейтингинин көч башында Финляндия турат. Бул мамлекетте каттоого алынган патенттердин көрсөткүчү, адамдардын эркин жүрүүсү, сөз эркиндиги, киберкоопсуздук, качкындарды кабыл алуу көрсөткүчү, жаратылышты коргоо келишимдери мыкты сакталган. Ошондой эле соода-сатыктын ачыктыгы, чет элдик инвестицияны тартуу жана азык-түлүк жактан жардам берүү жолго коюлган.
Мурдагы СССРдин курамындагы мамлекеттердин ичинен Эстониянын (14-орун) көрсөткүчтөрү эң жогору. Андан кийинки орунда Латвия (21-орун) менен Молдова (27-орун) турат. Рейтингде Россия 41-орунда болсо, Белоруссия 54-орунга татыган.
Ал эми Кыргызстан (69-орун) Бразилия (71-орун), Сауд Аравиясы (95) жана Казакстанды (102) артта калтырган.