БИШКЕК, 24-янв. — Sputnik. Мас абалында унаа башкарып баратып кырсыктаган милиционер ички иштер органдарында төрт жылдан ашык убакыттан бери иштейт. Бул туурасында Sputnik Кыргызстан агенттигине укук коргоо органдарындагы булактар билдирди.
Билдирмеге караганда, инспектордун аты-жөнү Мажитов Эльхан Мирланович, 1993-жылы Нарындын Кочкор районунда туулган.
"Мажитов ички иштер органдарында 2014-жылдан бери иштечү. Кыргыз мамлекеттик юридикалык академиясын кенже лейтенант чини менен аяктаган. Андан соң "Атайын даярдыктагы полк" кызматына орношкон. Өткөн жылдын август айында Октябрь райондук ИИБине аймактык тескөөчү болуп дайындалган. Үй-бүлө кура элек", — деп айтылат маалыматта.
Ушу тапта милиционер Бишкектеги Ортопедия жана травматология илим изилдөө борборунда жатат. Башкы дарыгер Алмазбек Кубатбековдун айтымында, Мажитов оор абалда келип түшкөн.
"Милиционер ооруканага көк боору жарылып келген. Аны алып таштадык. Кабыргалары жана жамбаш сөөктөрү сынган. Ал өзүнө келип, кан басымы бир калыпка түштү. Бүгүн же эртең травматология бөлүмүнө которобуз. Жакын арада жамбаш сөөгүнө операция жасалмакчы", — деди башкы дарыгер.
Өзгөчө кырдаалдар министринин орун басары Калыс Рахматов мерт болгон келин аталган ведомстводо кызматкер экенин кабарлаган. Ал ӨКМде 2010-жылдан бери тарбиялык иштер бөлүмүндө капитан болуп иштеген.
Бишкек шаардык милициясынын жетекчиси Сталбек Рахманов экспертизанын алдын ала жыйынтыгына таянып жол кырсыгын милиционер шарттаганын жана анын мас абалда болгонун тастыктады.