БИШКЕК, 21-янв. — Sputnik. Транспорт жана жолдор министрлиги ИИМ менен биргеликте рейд өткөрүп, машинасынын терезесин караңгылатып алгандарды аныктайт. Бул тууралуу транспорт министрлигинин маалымат кызматы билдирди.
1-январдан тарта күчүнө кирген Эреже бузуу жөнүндөгү мыйзам боюнча машинасынын терезесин мыйзамсыз караңгылатып алгандарды транспорт министрлиги тескейт. Буга чейин бул милдет ИИМдин Жол кыймылы коопсуздугун камсыздоо башкы башкармалыгына таандык болчу.
Эми ИИМ бул милдетти кайра өзүнө алуу үчүн тийиштүү түзөтүүлөрдү демилгеледи. Мыйзам долбоору өкмөт тарабынан жактырылып, Жогорку Кеңештин кароосуна сунушталып, биринчи окууда каралып жатат.
"Акыркы чечим кабыл алынганга чейин Транспорт министрлиги ИИМ менен биргеликте мыйзам бузгандарды аныктоо боюнча рейд өткөрөт", — деп айтылат маалыматта.
Ошондой эле транспорт министрлиги менен милиция өзүм билемдик менен үн чыгаруучу жабдууларды коюп алгандарды да аныктайт.