Буюм сатып алууда нускамаларынын кайсы тилде жазылуусу жана тексттин сапатын жөнгө салуу милдети эч бир мамлекеттик органга жүктөлгөн эмес. Бул тууралуу Мундузбек Абдыжапар уулу Sputnik Кыргызстан радиосунун эфиринде маек куруп жатып билдирди.
Анын айтымында, өлкөгө кирген товарлардын агымы чоң болгондуктан көзөмөлгө алуу оор.
"Экономика министрлигине караштуу Стандартташтыруу жана метрология борбору, Бажы, Чек ара кызматы өлкөгө кирип жаткан товарлардын курамы жана сапатына гана жооп беришет. Сыртындагы жазуулардын мазмунуна көңүл бурушпайт. Мисалы, коңшу Казакстанда казакча жазуулары жок товарларды чек арадан эле өткөрбөй коюшат. Биз дагы ушундай сунушту киргиздик. Бүгүнкү күндө тиешелүү кызматтар аракет кылууда. Бирок бардыгына жетише албай жатат", — деди Абдыжапар уулу.
Ошондой эле ал Мамлекеттик тил комиссиясына товарлардагы жазууларды көзөмөлдөп, аларды бекитүү укугу берилсе жакшы болоорун кошумчалады.