БИШКЕК, 21-янв. — Sputnik. Мамлекеттик цирктин директорун шайлоо создуктурулуп жана жамаат көрсөткөн талапкерге аткаминерлер көңүл бурбай жатканына нааразы болгон труппанын мүчөлөрү Ак үй алдына митингге ат минип чыгышты.
Труппанын жетекчиси Данияр Бөлөкбаевдин айтымында, цирктин директору 45 күндөн бери шайлана элек.
Бүгүн нааразылык акциясына чыккандар цирктин директорлугуна Аида Акматованын талапкерлигин көрсөткөн, бирок аны министрлик дайындабай жатат.
"Бир жарым ай мурда цирктин жетекчиси алынган. Биздин жамаат бир добуштан Аида Акматованы көрсөткөнбүз. Жетекчилик кызматка циркти билген киши келиши керек. Акматова жети жашынан бери циркте иштеп, көйгөйлөрүн жакшы билет. Ал 3-4 жылда цирктин аброюн көтөрөт деп ишенебиз", — деди ал.
Бөлөкбаев ошондой эле алардын койгон талабы аткарылбаса, митингге чыккан 39 киши эртеңден тарта арызын жазып иштен кете турганын кошумчалады.
Учурда митингге милиция кызматкерлери көз салып турат.
Эскерте кетсек, цирк чуусу бир топтон бери уланып келе жатат. Цирктин жамааты жетекчиси Курмангазы Исанаевдин ишине, коррупциялык аракеттерге нааразы болсо, Исанаев өз кезегинде даттануунун бардыгы аны кызматтан алуунун айла-амалы болуп жатат деп сыпаттаган. Акыры жетекчи кызматынан алынып, ордуна барчулардын аттары аталган. Бирок али күнчө директор дайындала элек.