БИШКЕК, 16-янв. — Sputnik. Ушу тапта Кыргызстанда картошка дүңүнөн 5 сомдон жогору сатылбай, дыйкандар убара тартып жаткан кез.
Былтыр өкмөт Өзбекстан менен ири көлөмдө картошка экспорттоо боюнча келишим түзүлгөнүн айтып, Айыл чарба министрлиги дыйкандарга дал ушул жашылчаны эгүүнү сунуштаган. Эми минтип карапайым эл 100 тоннага чейин түшүм алгандан кийин татыктуу баада сатып алчу кардар таппай карайлап турат.
Бирок жакынкы күндөрү кайрадан Айыл чарба министрлигине баш бакканыбызда, министр "өкмөт картошка баасын көтөрүү үчүн болгон аракетин кылганын, бирок бааны базар аныктай турганын" айтып алакан жайды. Демек, дыйкандар эмгегин талаага кетирип, картошкасын 5 сомдон сатууга аргасыз.
Эмнеге мындай кырдаал түзүлдү? Совет доорунда башка өлкөлөрдөн кем калышпай, ар тармагыбыз күпүлдөп иштеп келбеди беле. Агезде Кыргызстанда беш жүздөн ашуун ири ишкана ачылып, өндүргөн товарлар ондогон чет өлкөгө жөнөтүлүп турган. Мисалы, бизде качандыр бир кезде антибиотик, патрон, кир жуучу машина жана ЭВМ (ЭЭМ) чыгып турганына азыр ишенүү кыйын.
Башка тармагын тим эле коелу, коңшу жана союздаш өлкөлөрдүн (ЕАЭБ) айыл чарбасында эмне кеп болуп жатканына кызыгып көрдүк.