БИШКЕК, 16-янв. — Sputnik. Депутат Экмат Байпакбаев андагы маалымат боюнча Айыл чарба министрлиги 20 жылда дээрлик 1 миллиард доллардай грант, насыя алганын Жогорку Кеңештин жыйынында билдирди.
Бүгүн парламент "Сугат айдоо жерлерин жарактуу жерлердин башка категорияларына жана түрлөрүнө которууга (трансформациялоого) мораторий киргизүү жөнүндө" мыйзамга өзгөртүү киргизүү тууралуу" мыйзам долбоорун карап, экинчи окууга киргизди. Анда заманбап ветеринардык, фитосанитардык лаборатория куруу үчүн Сокулук районунан 3 гектар жер бөлүп берүү каралган. Аталган лаборатория Кытайдын техникалык жардам катары берген 20 миллион доллар грантына курулмакчы.
Депутат эгерде министрлик ушул темп менен кете берсе, ага бөлүнгөн 5 миллиард дагы абалды оңобой турганын айтты.
"Айыл чарба министрлигине укук, күч бериш керек, андан кийин гана сурасак туура болот. Бүгүнкү күнү бул министрлик тепкиге алынган гана топ. Колунда эч кандай күч жок болсо эмне кылат? Жердин баары таланып кеткен. Мына, үч гектар жер бөлүүнү эки сааттан бери талкуулап жатабыз. Өздөрү эч нерсе чече албайт", — деди депутат.
Эл өкүлү Айыл чарба министрлиги грант, насыя берген уюмдар менен мамлекеттин ортосундагы эле ортомчу болуп калганын баса белгиледи.
"Андыктан Айыл чарба министрлигине башкача стратегия карап чыгыш керек. Азыр эч нерсе чече албайт, көптөгөн киши жөн эле жүрөт. Анда министрликти жоюп салыш керек", — деди Байпакбаев.
Депутат Айыл чарба министрлигине жер колдонуу боюнча укук берилбесе, алар эч качан өз алдынча министрлик боло албай турганын кошумчалады.