БИШКЕК, 13-янв. — Sputnik. Баварияда Кызыл чырым коому кардан улам жолдо калган жүк ташуучу унаалардын айдоочуларын куткарды. Ал эми Мюнхенден алыс эмес жерде бак кулап, бир баланы басып калганын BBC басылмасы жазды.
Швециянын түндүк аймактары калың кардын алдында калды.
Бавариянын түндүгүндөгү темир жолчулар баарынан көп жабыркаган. Себеп дегенде темир жолго калың кар түшүп, жолду кулаган бак-дарактар бууп калган.
Бертехсгаден аймагындагы жолду кардан тазалоо үчүн 200дөй аскер кызматкери тартылып, алар коммуналдык кызматка жардам бермекчи.
Ал эми Австрияда абал бир аз жакшырганы менен жума ичинде бийиктиги 3 метрге жеткен кар түштү. Анын кесепетинен жети киши каза болуп, эки турист дайынсыз жоголгон.
Калың жааган кар аэропорттордун иштөөсүн дагы үзгүлтүккө учуратты. Мюнхен аэропортунда 90дой аба каттам токтотулган. Франкфурт аэропорту да бир нече каттамды токтотууга аргасыз болгон.
Швейцариядагы Сантис-Швегальп курортундагы "Швегальп" мейманканасынын айнек эшиктери сынып, кар имараттын ичине чейин кирип кеткен. Мейманканадагы туристтердин баары чыгарылган.
Андан сырткары, кардын калыңдыгынан Бавариянын Герольд айылы башка шаарлар менен байланыша албай калган.