БИШКЕК, 10-янв. — Sputnik. Мажилис депутаттары (парламенттин кичи палатасы) кыргыз-казак чек арасы тууралуу өкмөттөр аралык келишимди ратификациялады. Бул тууралуу Sputnik Казакстан агенттиги жазды.
Жарандардын жана транспорттун чек арадан өтүү тартиби каралган документке 2017-жылы кол коюлган.
Казакстандын Коопсуздук комитетинин Чек ара кызматынын директору Дархан Дильмановдун айтымында, эгемендүүлүк жылдарынан бери кыргыз-казак чек арасы аркылуу өткөн адамдар менен жүктөрдүн саны сегиз эсеге өстү.
"20 жыл мурда курулган инфраструктуранын азыркы элдин жана жүктүн агымына алы жетпей жатат. Андыктан тоскоолдуктар жаралууда", — деди Дильманов.
Казакстан менен Кыргызстан "Сарытөбө" жана "Аукатты" өткөрүү пунктуларын эки тараптуудан көп тараптуу категориясына өткөрүү боюнча макулдашканын биринчи вице-министр Роман Скляр айтты.
2017-жылдын октябрь айында кыргыз-казак чек арасында тоскоолдуктар жаралган. "Ак-Жолдо" кезек күткөндөр көбөйүп, "Ак-Тилек" өткөрүү пунктунда фуралардын тыгыны жаралган. Буга ошол кездеги президент Атамбаевдин билдирүүсүнөн кийинки пикир келишпестиктер себеп болгон.